Далай Багшийг уламжлал ёсоор хүлээн авав

2013 оны 7 дугаар сарын 18

Энэтхэг, Карнатака, Мундгод, 2013.07.18. (Дэккан Хералд) – Төвдийн Бурханы шашны тэргүүн Далай Лам Мундгод дах Төвдийн хийдэд морилов.
Дээрхийн Гэгээнтнийг Мундгодын хил залгаа Санаваллигийн орчим мужийн дэд комиссар Имконла Замир баглаа цэцэг барин угтлаа. Түүний хамт тусгай хамгаалалтын багийн туслах комиссар Ражу Могвээр, Сирси болон бусад хүмүүс байлаа.

Угтан авагсадын баяр хөөр

Өглөөнөөс эхлэн Далай Багшийг морилон ирэхийг хүсэн хүлээсэн Төвдийн буддист лам нар, хөгшид эмэгтэйчүүд зам дагуу хүлээн уламжлал ёсоор угтахаар зэхсэн байлаа. Хэдийгээр шиврээ бороотой байсан ч тэд цагаан хадаг, цэцгийн баглаа “Дууп Батти” барин хүлээв. Мөн харааны бэрхшээлтэй оюутнуудын хэсэг үндэсний тугаа барин Аммажигийн ойролцоо зогсов. Төвд эмэгтэйчүүд өөрсдийн үндэсний хувцсаа өмссөн гоёсон байлаа. Хүлээн авалтын 3 дугаар хэсэг дээр Кендриа Видиалъяагийн сургуулийн багш сурагчид хөгжим тоглон Далай Багшийг угтан хүндэтгэл үзүүлэв.

Ийнхүү цаг агаар бүрхэгдүү байсан ч Төвдүүд Далай Багшийг сэтгэл татам халуун дотноор угтан авлаа.

Далай Багш Брайбун Лачи хийдэд морилон ирэхэд лам нар буддист уламжлалт хөгжим эгшиглүүлэн цуурайтуулан хүндэтгэлтэйгээр угтан авав. Далай Багш Брайбун хийдэд тусгайлан ном айлдав.

Далай Багш Мундгод хотод найм хоног морилох ажээ.


Эрчимжүүлсэн хамгаалалт

Боди Гаяад болсон эмгэнэлт явдлын улмаас Далай Ламын аюулгүй байдал, хамгаалалтыг чангаруулсан тухай тусгай ажилтан Дилээп мэдэгдэв.
Мөн тэрээр хэвлэлийнхэнд хандан Брайбун Лачи хийд болон Далай Багшийн морилох хийдүүдийн аюулгүй байдлыг хангах үйл ажиллагаа эрчимжсэн талаар тэрээр мэдэгдэл хийв.

Бихарын Бодь Гаяад болсон хэд хэдэн тэсрэх бөмбөгийн улмаас Төвдийн сайд нарын зөвлөлөөс Карнатака мужийн нарийн бичгийн даргад хандан Далай Ламын аюулгүй байдлыг хангах үйл ажиллагааг эрчимжүүлэхийг хүссэн захидал илгээжээ.