Дискитээс Сумурын зүг хөдөллөө

2018 оны 7 дугаар сар 14

Энэтхэг, ЖК, Ладак, Сумур – Тиксей ринбочэ, Гэлкан ринбочэ болон бусад лам хуврагууд, мөн нутгийн олон сүсэгтнүүд Дээрхийн Гэгээнтэн Далай Ламыг үдэхээр цугласан байлаа. Дээрхийн Гэгээнтэн өнөөдөр Дискитээс Нүбра мөрөний эх, уулын оргилд байрлах Сумурын зүг хөдлөх юм.

Нүбра тосгоны олон хүмүүс гартаа хүж, цэцэг, хадаг барин инээмсэглэн Дээрхийн Гэгээнтэн Далай Ламыг үдэж байв. Ихэнх хүмүүс бурханы шашинтан боловч зарим газарт муслимын шашинтнууд түүнийг үдэн зогсож байлаа. Нүбра тосгоны гудамжаар явсаар Шёок мөрөнийг гатлахад замын хоёр талаар чулуун хана босгож мал, амьтад замд нэвтрэхээс хамгаалсан байв.

Зам Сумурын зүг эргэн уул өгсөх үед Ламдон сургуулийн сурагч хүүхдүүд дүрэмт хувцсаа өмсөн Дээрхийн Гэгээнтэн Далай Ламын залбирлын дууг дуулж угтлаа.

Хийдийн өмнөх талбайд Дээрхийн Гэгээнтнийг уг хийдийн хамба лам, Гандан Ширээт асан Ризон ринбочэ, мөн Цүлтим Няма болон бусад хутагт хувилгаад хүндэтгэлтэйгээр угтав. Түүнийг уулзалтын танхимд урин залсанд тэрээр танхимд буй мэргэд дээдсийн дүрийн өмнө хүндэтгэл үзүүлээд өндөрлөгт орших танхимын цонхоор нутаг орныг бүхэлд нь тольдоод суудалдаа суув.

Цай, хүндэтгэлийн идээгээр үйлчилсний дараа Дээрхийн Гэгээнтэн Ризон ринбочэд хандан өндөр насны улмаас ядрах нь нэмэгдсэн тул ажлын төлөвлөгөөг багасгах шаардлагатай болж эхэлснийг дуулгалаа. Ямартаа ч ховор нандин номын увидас хайрласан Ризон ринбочэд амласан амлалтаа биелүүлж түүний урилгаар энд хүрэлцэн ирлээ гэв.

Дээрхийн Гэгээнтэн Далай Лам маргааш нээлтээ хийх энэ жилийн Зуны их чойрын тухай ярихдаа түүнийг залуу байхад Төвөдөд гайхамшигт эрдэмтэд олон байсныг дурсан ярьлаа. Тэрээр төв үзлийн гүн ухааны их эрдэмтэн Монголын Ойдүв Цогни ламыг дурдсан юм. Мөн тэрээр гэвш лхаарамбын шалгалт өгөх номын мэтгэлцээнд учир шалтгааны ухаанаар Монголын Чойдаг ламтай таарч хүндхэн байдалд орж байсан тухайгаа дурсав.

Тэрээр Амдо, Хам нутгаас олон эрдэмтэд төрөн гарсан хэмээгээд хэдийгээр Энэтхэгт цагаачлан амьдарч байгаа ч урьд өмнө зөвхөн хурлын зан үйл үйлддэг олон дацан хийдүүд, ялангуяа эмэгтэйчүүдийн хийдүүд бүгд буддын гүн ухаанд суралцдаг болсон амжилтыг тэмдэглэн хэллээ. Мөн тэрээр хэзээ нэгэн цагт Төвөдүүд улам нэгдмэл болж сургалт судалгааг өргөн хүрээнд явуулж, өмнөх эрдэмтдийн адил олон олон эрдэмтэн мэргэд төрөн гарна гэдэгт итгэлтэй байгаагаа мэдэгдэв.

Ийнхүү Дээрхийн Гэгээнтэн Далай Лам сэтгэгдэл өндөртэйгээр үгээ төгсгөөд амрахаар өргөөндөө морилсон юм.